Gaokaoqkaoq gae’lye heeldoq gee
Ngael laoq dalxoq zhoq duq li e dalxoqsen lil. Ngael meelhee’lye fu ae’lye aeqdae aeqmae nyegael jiaolhuil’ae bael li lil, jiaolhuil vae shigo changl, Momil e Suqhhaq duq, heeldoq gee, kaol cholyaeq haelmillye mulkiq maoqhhae lye geemyeq mael zhee xoqxiq aeqwae.
Ngael meelhee’lye fu ae’lye heeldoq gee mael zhee hhaol laeq hhae, aeqchee silqinq puqlael feiq, cholyaeq qiq hhaeq maeq zhol myel vae yil, kaol ochoq maeq bael gaeq myel Hhaoqsongl yiqsi’ae heeldoq gee lil. Gaozong’ae suqhhaq duq keel li laol, xoqxiq mael nyeq’ei ta nyeq’ei maeq yael vae, suqhhaq taq’ae geemyeq mael ngael maeq siqcongl e zhee naeq hhae. Aeqdae aeqmae ngaeq’ae gee laeq: “Ngaeteel eiq maeq loq yae, noq’ae maeq bael bang ongl yae, noq e xoqxiq e silqinq mael nol Momil’ae heeldoq gee biq kael’ae, ngaeteel eiq noq’ae heeldoq bael gee laeqngeel, ngaeteel noq’ae baelzongl ongl mael laoq, heeldoq bael gee ongl dyul wae, Hhaoqsongl noq’ae geel mael biq biq’ae lye xiangxinl lil.”
Gaozong’ae suqhhaq duq fu, hhal mul’yo mael gaokaoq dyul maeqcil’ae, hae yil ko e huilkaoq eiq mul’yo hhae. Huilkaoq mael maeq kaoq gol hhei kaollaoq, zail kaoqhoq maoq wae siq, kaoqhoq mael maeq kaoq gol hhei’laol, biq’yeqzenl dyeq’ei maeq heil hhei ongl’ae. Huilkaoq e fensul zhee di kaollaoq, kaoq gol hhei kaol’eiq, aeqgael dalxoq duq li maoqlye sen’qinq fu eiq yinqxiangq kiq hhae. Ngaeq e xoqdo hhei maellye gee’li’laol, mee’nae ko laoq ngael laoq C paelsilmyel D maoq maeq kaoq du hhei ongl yae, tyulkaol, ngael zhoqmyel huilkaoq silqinq gae’lye heeldoq gee lil, aeqdae aeqmae vae eiq baeqjyelboq e cholyaeqhael’ae ngaeq’ae heeldoq bael gee laeq lye bael gee hhei gil biq lye gee biq lil. Yoqhhaeteel jiaolhuil vae lye haeqfu eiq huilkaoq gae’lye ochoq’ae ngaeq vae heeldoq bi bael gee hhae, aeqnaol, ngael hae yil ko eiq kaoq gol dyul maeqcil, hae yil ko eiq B kaol B e holtaq’ae kaoq du hhei lil, san ko laoq A kaoq du hhei lil. Ngael zhee meeqyaevae lye gee lil, Momil laoq ngaeteel yoqhhaeq’ae heeldoq gee biq mael naelhaeq laeq vae.
Gaokaoqkaoq e shiqsen nyeq’ei ta nyeq’ei hhael nil lael vae, donqpyeq e suqhhaq duq e yelchoqhael hhaeqnaeqnaeq caeq maeq loq myel suqhhaq fu hhae, ngaeq’ae laoq nyeq’ei xoq laol nyeq’ei qiq giq maeq loq myel zongl laeq hhae, haefuq qiq zeal kaoqshil kaoq fu suqhael ongqjyeq maoq maeq kaoq du hhei yil. Ngeelfeiq, aeqsul eiq loq’ae, gaokaoq e fensul mael ngaeqhael ongqjyeq kaolmaoqlaol dalxoq duq jihuil maqza’ae. Zoqgiq kaol nyuqpu nyuqda myel nyuq e ngael laoq, aeqyoyoq e gaokaoq e silqinq mael Hhaoqsongl’ae toqshiq hhei biq maoqlaol qiq giq maeq ongl yae vae, kaol baeqjyelboq e aqsseq aeqnilhael’ae ngaeq vae maqqyemyel heeldoq bi bael gee lil.
Gaokaoqkaoq du hhei’laol, ngael ngaeq e cenqjiq mael fu hhei’laol, tyulmael ngaeq e fensul’ae lye maeq xiangxinl peq laq hhae. Haelzael’ae kaoq fu laoq yuqhael fen eiq maeq kaoq du hhei gol yil, yaeqmeel qiq pu laoq yuqhael ngaeqqyel fen kaoq du hhei lil, gee deelhhei dyul fensul zoq lal maoqmyel wae, kaol benqko duq e xiwangl za vae.
Yaeqmeel, ngael dalxoq qiq gael vae benqko duq lil. Ngael ngaeq e gaozong e xoqxiq mael’ae fu hoq hhei’laol, ngael tyuhael laoq gilzuqmyel Hhaoqsongl e endianq’ae lye maoq maeq gee kiq yae vae. Silqinq xihael ae’lye ngael loq aeqwae: Momil laoq aedeeteel e gilzuqmyel e silqinqhael guangxin laeq’ae, aedeeteel yoqhhaeq nyegael guangxil meeq maoqhhae, duqlye yoqhhaeq e yiqsi’ae heeldoq gee laol hhaeq vae, ssuqhaoq caqzaq, mulhhael mul paelsilmyel xoqxiq haoq, yoqhhaeq aedeeteel’ae fupol laeq’ae.
(Cu e qiqhhaeq: Enhuil)
