Neemae meeq e keeqmae
Yilkaeaeqnao, sheeqcongq congqmae vae, cholhaoq hhaoq haoq maoq maeq zhol e pusiq siqyaeq qiq pusiq za’ae. Pusiq vae yuqqyel hoq zoq e cholhae aeqmae qiq hhaeq zhol’ae, cholmil mael Axi lye gul biq hhae. Axi mulzaeq lael e aeqnaol’ae yaeqguq maeq du’lal gol biq’ae, yoqhhaeq e haqyo eiq ngaeq hoq laol siq biq vae, laoqhaol vae heiqqyel hoq zoq e mabyeqbyeq biq e ssuqmae qiq hhaeq maoq maeq zhol’ae. Yoqhhae niq maeyaeq’ae aeqhael kaol haeldye qiq koq eiq maqza biq’ae, kaol naochomyel ochoq toq’ae aeqhael bal mulzaq bal mulzaq myel zonglzhol hhae.
Axi yoqhhaeq e ssuqmae’ae zheemeeq biq hhae, yoqhhaeq haeqfu qiq zael ochoq toq’ae aeqhael bal mul biq, kaol aelhoq zaeq fu, ochoq lye noda hhei biq e ngaeqdyel kaol saeqzil mael maeq zaeq sheqhhaq myel yoqhhaeq e ssuqmae’ae heil hoqli biq, milsheqzaeq fu, yoqhhaeq laoq aelhongq hongqsheq maq vulzaq sheq hhaq’ae, ngeelfeiq, yoqhhaeq e ssuqmae’ae laoq vul biq’ae.
Yoqhhaeq ochoq toq’ae lye aeqhael mul hoqlaq, hhaeqdyul zhee dyul biq feiq, ssuqmae’ae yotyel ha’lye qiq zaeq eiq maeq gulzhee biq’ae, aelhoq baq cu biq, aeqkiq vuqjyel za’lye baq hhae, yoqhhaeq haeqfu eiq ssuqmae’ae xilnye zhaofu biq hhae.
Qiq hoq laoq, tyuqvae milcaeq vae hoqlaq maeqmeeq myel peqlal, kaol yoha yoqhhaeq’ae aeqgael yoqhhae toq’ae aeqhael maq bal mul laq kaelvae lye gee biq. Axi gaeq hhei biq laol, zhee nyuqsaeq biq’ae, kaol yoha hamae’ae geezaeq biq: “Ngatoq’ae yaeqmoq moqmae qiq hhaeq zhol waesiq, nol ngaeq’ae dyuqbaq maeq heil laeq kael, qiq nao aelhoq niq byel bi zaeq laeq laol hhaeq vae.”
Yoha xitaeq laoq neemae maeqmeeq’ae, kaol yoqhhaeq’ae geebiq: “Hhaeq’ae, notoq’ae yaeqmoq zhol siq kaollaoq, nol haeqfu qiqzael laoqhaol vae hoqli maoq fu, aqlaq mael noq lye gi du hhei e saeldu aeqxul mael’ae tyuqdo hhei, laoqhaol vae hoq keelli laol, aqlaq mael’ae su e saeldu aeqxul mael ciqgae hhei, kaol noq e ssuqmae’ae he hhei biq.” Axi qiqgiq banlfaq maqza biq, kaol ma’eel tye’lye hhaeq’ae lye geehoq biq. Yoqhhaeq haeqfu qiq nao eiq mqkiqkiq lye laoqhaol vae hoqli hhae, hoq keelli laol, aqlaq mael’ae su e saeldu aeqxul mael ciq gae hheikaol ssuqmae’ae he biq hhae.
Qiq nao laoq, Axi yoha toq ae’lye hoqlal, tyuqfu, mqkiqkiq gayi goqbiq wae. Yoqhhaeq gaelmae galchi vae deel fu, golcongq ae’lye haeqsseeq qiq mal dil duyi. Sheqpyeq zilvuqlye Axi’ae chifu biq, kaol yoqhhaeq guaeq’ei gu biq’ae, yoqhhaeq neemae mael’ae nyuq: “Ngael sil mael hhael shoq oqyaevae, ngeelfeiq, ssuqmae’ae hhaoqsaeqsaeq yae, ngael sil hhei kaollaoq yoqhhaeq’ae zhaofu e qiq hhaeq eiq maeq zhol wae.” Kaol yoqhhaeq nyul tullaeq, vuqduqtongq gae hheikaol haeqsseeq mael’ae geezaeq biq: “Haeqsseeq o, nol ngaeq yaol zaeq maoqlye kaollaoq, ngael maeq bi zaeq lye maeq zongl yil, ngeelfeiq, nol ngael geezaeq mael naelhaeq laeq, ngatoq’ae mabyeqbyeq biq e heiqqyel hoq zoq e yaeqmoq moqmae qiq hhaeq zhol wae siq, qiq hhaeq zhaofu songl maeq zhol’ae, ngaeq’ae laoqhaol vae bi hoqli laq, kaol ngaeq e aqlaq mael’ae su e saeldu aeqxul mael ciqgae hheikaol yoqhhaeq’ae aeqnaol naolli e aelhoq qiq byel bi zaeq maoq yae, xilmael zongldu hhei’laol, ngaeq yaol noq’ae bi zaeq laeqngeel.”
Haeqsseeq gaeq hhei biq laol, hhaoqsaeqsaeq li biq, kaol qiqjyel boq’ae deeltael yil vae, Axi laoqhaol vae hoq keellael laol, haelzael’ae laoqmyel aqlaq mael’ae su e saeldu aeqxul mael ciqgae hheikaol he hhei biq, ssuqmae zaeqdye hhei’laol ssuqza vae, Axi lye aelbee cheelkaeq deelsaeq biq laol, ma’eel zhu’lye deelsae hhei vae, yoqhhaeq haeqsseeq zhol myelvae hoq keellael vae, haeqsseeq myeqbongq gu’ngae hhei, kaol Axi yaol baq hheikaol deel vae.
Haeldyul dyulmae deel hhei’laol, yoqhhaeq yaol haqlo taq’ae beiq da deelhhei biq, haeqsseeq hhaeqdyul dyulbiq kaol dongqpyeq vae yuqxulteeq vae, Axi ma’ne gupye hheikaol dongqpyeq dongqjyel vae chifu, dongqpyeq vae haeqvae eiq cholyaeq e saeq’yuq, jyeqyaeq e saeq’yuq gae bong byel’ae, kaol eezi deel beeq hhei e aelhongq eiq gae, aelhongq holhhaq’ae zheelniqlye moqgoq gae yol mol hhei biq, yoqhhaeq aeqyae’lye cheelpong hheikaol chifu yil’ae, tyuqvae pulziq pulsheel kaol pyuqjyeqjyeq e moqgoq zhee gae bong byel hhae, xihael laoq haeqsseeq lye baqzaq laq e cholyaeqhael’ae pi hhei mael’ae. Axi aelhongq mael heiga hhei, xihael gilzuqmyel tocu hhei, kaol aeqyae’lye tyuqvae lye deelsae hhei vae.
Axi laoqhaol vae hoq keellael laol, xihael heildu hheikaol, ssuqmae’ae bi sofufu, kaol yoqhhaeq’ae hael puqlael biq hael ssuqmae’ae geedu hhei biq, ssuqmael zhee hhaol biq’ae, kaol yoqhhaeq’ae geebiq: “Yaeqmiq o, meeq e cholyaeq’ae laoq, meeq myel puqlael kiq’ae, maeqmeeq e cholyaeq’ae laoq maeqmeeq myel puqlael kiq’ae lye geegil mael laoq hoq she, aedeeteel mulzaezae kiq maoqhhae, kaol saeqyaeqhael’ae byel biq maoqhhae.”
Aeqnaol, yoqhhaeq yoqhhaeq e ssuqmae yaol sheeq hhei, pulziq pulsheel hael heil hheikaol pusiq ae’lye deelsae hhei vae. Yoqhhae niq maeyaeq’ae dyuqbaq zacongl lael biq vae, ngeelfeiq, ochoq’ae maeq fu’qiq’ongl yae’lye maeq zongl’ae, saeqyaeqhael’ae mulyo biq fu, yoqhhaeteel dyuqbaq heil gil biq’ae, zaeqzael eiq heilmoq gil biq’ae. Kaol tyuq ae’lye aeqnaol, Ha’niq cholyaeqhael Axi’ae ‘Neemae meeq e keeqmae’ lye gul gil biq hhae.
