Aelhongq mael'ae aqhhoq chocheeq
Yilkaeaeqnao, Ha’niq pusiq’ae zhigaqlye, zhee kyul gae'lael aeqmyel yaeqmiq qiq hhaeq zhol’ae. Cholmil mael Jyeqsal lye gul biq hhae.
Qiq nao mqshoq neelmae zhoq du’lal fu, Jyeqsal habye pi hheikaol aeqhael mul yil, yoqhhaeq gaelmae deel fu aeqmaoq deel laeq e yotyel gaeq hhei biq, aeqmaoq mael’ae suqhhaq zhee loq e laqkiq qiq hhaeq ziq hhei e mol hhei biq, tyutaeq e cholmil mael Geelcholyaeq lye gul biq hhae. Geelcholyaeq Jyeqsal’ae naelhaeq biq: “Aelnaoq, noq’ae aeqchee lye gul laeq hhaemaeq? Nol aeqchee zongl yil maoqlye lilmaeq?” Yoqhhaeq geehoq biq: “Ngaeq’ae Jyeqsal lye gul laeq hhae, ngael aeqhael mul yil maoqlye lil.” Geelcholyaeq yilkaefu xilnye saeziq gaeq gol biq‘Geelcholyaeq qyel hhaeq feiq Jyeqsal qiq hhaeq dyul maeq geel’ae.’Tyulkaol, yoqhhaeq neemasu biq’ae,。
Yaeqnao deelpuq hhei biq laol Jyeqsal nyegael geegae maoqlye nyuq biq. Tyulkaol, Jyeqsal’ae naelhaeq biq: “Nol qiq nao myel aeqhael duq, qiq nao hae’nae qyeq’oq duq lilmaeq?” Yoqhhaeq geehoq biq: “Geelcholyaeq nol qiq nao myel aeqmaoq ziq, aeqmaoq mael qiq nao hae’nae toq deel hhaemaeq?” Geelcholyaeq maeq geedu hhei ongl biq’ae. Geelcholyaeq ngael noq’ae qiq doq naelhaeq maoq yae: “Milcaeq taq’ae aeqchee mael hhael chil hhaemaeq?” Yoqhhaeq gee: “Baq'eel.” Jyeqsal geehoq biq: “Ngael nyuq laoq maq hoq’ae, milcaeq taq’ae hhael chil mael laoq aeqmae e aeqchil'ae. Baq’eel chil feiq yaeqguq maeq cu heeqda hhei ongl, aeqmae e aeqchil mael laoq yaeqguq cu heeqda hhei ongl'ae.” Geelcholyaeq gee: “Hoq yae.” Jyeqsal yol naelhaeq biq: “Milcaeq taq’ae aeqchee mael hhael maol hhaemaeq?” Yoqhhaeq geehoq biq: “Xilmael laoq ngael loq lil, milcaeq taq’ae hhael maol mael laoq lolbaeq’ae.” Jyeqsal eel biq, gee: “Milcaeq taq’ae hhael maol mael laoq cholyaeq e neemae mael'ae nyuq mael’ae, neemae onglci’ae nyuq mael laoq maeq molcongl’ae, lolbaeq maol feiq lolvuq loldongq lye za.” Geelcholyaeq Jyeqsal’ae maeq geemil ongl biq, tyulkaol, yol gee: “Aelnaoq, ngael noq’ae maeq geemil ongl yae, saeqvae lael, ngael noq’ae aqhhoq qiq kongq biq laqngeel. Aeqgael ngael noq’ae qiqzael eiq maeq yelbael yil kiq yaevae.” Jyeqsal zhee hhaol biq’ae, aqhhoq mael heil pol hheikaol, neeto oheiq e aelhongq mael vae chocheeq da hhei. Geelcholyaeq laoq deelsae hhei vae.
Tyuq ae’lye aeqnaol laoq, Ha’niq yaeqmiqhael Jyeqsal’ae nyuqdeel maoqlyekaol, aeqsul eiq neeto oheiq e aelhongq mael'ae aqhhoq qiq kongq chocheeq hhae, aqhhoq mael’ae laoq keelpongq teel leel da hhei hhae.
