Haeqlaeq kaol cholyaeq
Yilkaeaeqnao, Diqqi lye gulbiq e cholyaeq qiq hhaeq zhol’ae, yoqhhaeq laoq aqha yobo bomae’ae, zaeq eiq guaeq’ei zaeq henq hhae, qiq byel hhaqtyeq qiq yaeq zaeqdo ongl hhae. Qiq nao laoq, Diqqi zhee myeq biq, kaol haeqlaeq’ae hhaqtyeq qiqgael dyeqtyeq zaeq yil gil maoqlye geedazaq li biq, yoqhhaeteel dyeqtyeq hhei’laol, qiq hhaeq qiq pa byel zaeq gil maoqlye geemeeq wae. Kaol yoqhhaeteel hhaellaelmyel sheeqcongq’ae hhaqtyeq dyeqtyeq maoqlye hoqhhaq deelhhei li gil vae. Zhee qiqte lye laol, hhaqtyeq lael vae, haeqlaeq mael hhaqtyeq e longlguq mael’ae koqtyeq biq, Diqqi ki da’laq kaol hhaqtyeq e aeqkeel niq boq myel dega biq, kaol hhaqtyeq mael sil vae.
Hhaqtyeq xi qiq yaeq laoq zhee heeq hhae, Diqqi qiq hhaeq lye maq baq ongl biq’ae, yoqhhaeq eiq haeqlaeq’ae maeq byel goq biq, ngeelfeiq, yoqhhaeq qiq hhaeq lye yol maq baq hoqli ongl biq, kaol haelmillye zongl maoqhhae maeq lye banlfaq qiq mal nyul’ae, nyuq nyuq laol, banlfaq qiq mal nyuq du hhei vae. Yoqhhaeq zoqhaq aelbol de laq kaol bianqdanl geiq, yoqhhaeq baq boq’ae laoq, aelgong mael shega hhei, haeqlaeq baq boq’ae laoq, aelgong zhee cuq hhae. Haeqlaeq baq fu, co nael biq kaol aqla allal myel gul’ae, Diqqi gaeq hhei biq laol zhee hhaolbiq’ae, kaol yoqhhaeq’ae geebiq: “Nol aqla allal myel haeq gul, aeqgael hhaqtyeq mael dalmaqyil peqyil naol.” Ngeelfeiq, haeqlaeq mael nael biq kaol gaelmae qiq keel myel gul hhae, yoqhhaeteel laoqhaol vae hoq keellael laol, Diqqi haeqlaeq’ae aeqzaeq doqxil saelpo yil lye gee biq, haeqlaeq yoqhhaeq’ae naelhaeq biq: “Aeqzaeq doqxil mael haeqvae za hhaemaeq?” Yoqhhaeq geehoq biq: “Yulboq e geeqzhoq vuqduq vae, aeqhaoq byuqda maeq mol yil maeq?” Haeqlaeq mol hhei biq laol nae’naemyel ki yil vae, tyuqvae keelli laol, aeqzaeq doqxil maeq mol biq, yulboq e geeqzhoq vae chifu du hhei’laol, tyuboq’ae aeqhaoq byuqda mol hhei biq, kaol tyuboq’ae ki yil, ki keelyil laol, yol maeq mol biq, xiboq’ae chifu duhoq hhei’laol, xiboq’ae aeqhaoq byuqda mol hhei biq. Yoqhhaeq tyulmael laoq zhiqhaoq’ae lye maeq loq biq, kaol geeqzhoq xi niq geeqzhoq’ae kipu kida myel ki’ae, kaol duqhee’lye ki duqm biq laol, maq ki hhaeq biq, kaol laoqhaol vae hoqli vae.
Diqqi laoq haeqlaeq aeqzaeq doqxil saelpo li fu qiqlaq’ae, hhaqtyeq qiq yaeq myel puqmao hheikaol zaeqbyel vae. Kaol yoqhhaeq lye shil’yuq mael’ae dalmaqyil baq puq do hhei, haeqlaeq laoqhaol vae do’lal laol, Diqqi vae aeqzaeq doqxil maeq saelpopuq hhei yil lye geebiq. Diqqi yoqhhaeq’ae geebiq: “Maeqbeeq’ae, maeqbeeq’ae, nol hhaeqdyuldyul she vae, nol duyil hhei’laol, ngael eiq bael saelpo yil aeqwae, kaol saelpo hhei wae, aeqzaeq bodoq hheikaol caqmao wae, nol laefuq wae zaeq.”
Myeqkyuqkyuq biq e haeqlaeq shil’yuq mael’ae pulchi’lye qiq de demae mol hhei biq, kaol saeqcul’ae lye kei biq hhae, kaol aqlaq tyuqdo hheikaol dalmaqyil mael ko du hheikaol zaeq tyeq beq li vae. Zhee zaeqmyel gae’li biq’ae, ngeelfeiq, zaeq hhei zaeq hhei’laol, aqbibi ga beq yi biq, kaol aqla allal myel yol gul tullaeq, Diqqi zhee eelxul biq’ae, kaol yoqhhaeq’ae geebiq: “Nol haelmillye zongl lilmaeq? Baq feiq gul, zaeq feiq gul, fu hhei, hhaqsaeq mael aeqdilmyel dalmaqyil peqyil vae.” Haeqlaeq laoq Diqqi yoqhhaeq’ae baelyaelmyel zongl laeq hhae lye loq hhei biq. Kaol yoqhhaeq laoq cholyaeq nyegael maeq zonglyinq ongl yae’lye kei biq, kaol yoqhhaeq zhol myelvae hoqli vae, tyuq ae’lye aeqnaol laoq, cholyaeq kaol haeqlaeq yoqhhaeq mael yoqhhaeq zhol maoqlaol, qiqgael maeq deelpongq vae.
