Zaeq dol e beideelhhei mael
Beeqhongq cholyaeq zaeq dol fu, hhael zaeqmyel hael yaeqmoq’ae bi zaeq hhae. Aeqsul toq aqhhaq kaol aeqhae xyeqzaq, byelcongq vae lye byeljyeq bezaq laq kaol eiq, pusiq e yaeqmoqhael gul’eeq laeq kaol aelhoq qiqgael zaeq gil hhae. Milsheqzaeq fu, yaeqmoq laoq zilbaeq laefuq qiq heiq dol, oqbye laefuq qiq no nozaq kaolmaoqlaol, baeqjyelboq e cholyaeq qiq hhaeq eiq maeq hhae nozaq’ae. Zaeq fu, keeqmae laoq zaelzhee vae maeq hhae bael zhol da’li’ae, ssuqpaeq nyegael duqtyel qiq mal’ae maeq hhae zhol’ae, cholhoq nil e cholyaeq laoq yaeqmoq e yiqsi laoq keelku maq hha baqsse da, eelcael maq hhae mye’ae, yotyel ha’lye saeziq eiq maeq hhae gee’ae. Zaelzhee taq’ae baqda deelhhei e aeqhae vuqduq, neemae, saeqchee, congqbye kaol haebongl mael, yaeqmoq’ae bi zaeq maoqhhae. Beeqhongq cholyaeq laoq daeqxi’ae zhee hhaol biq hhae. Daeqxi laoqhaol vae do’lal laol zilbaeq, yaehoq kaol laeqkeil baqmoq ngeelvae, daeqxi lael laol maeqzaeq sheqhhaq myel mael zaelzhee’ae baqda hhei biq. Daeqxi’ae aeqhae xyeq biq kaollaoq, aeqhae vuqduq kaol haebongl mael daeqxi’ae bi zaeq maoqhhae. Xilnye zongl mael laoq, daeqxi’ae hhaol yae lye zongl hhae. Kaol xilnye saeziq qiq doq za'ae: “Daeqxi maeq lael laol oqbye maeqmeeq’ae.” Xihael laoq yilkaeaeqnao lye bei gaeyi aeqwae.
