Zhee nael biq mael meeq hoqlael biq
Zhang Gang’qiangq lye gul biq e qiq hhaeq milmae heeqmyel vae zhol hhae. Yoqhhaeq laoq Yesu’ae xinlzaeq mael mee’nae hoq zoq wae, xinlxin zhee meeq’ae, haeqfu eiq Momil e Suqhhaq mael duq kaol heeldoq gee, laqheiqqyel lye ochoq’ae fuqyin geegaeq biq hhae. Yoqhhaeq cholhoq zhee li feiq, Momil e Suqhhaq mael xoqxiq kaol ochoq’ae gee loq biq mael zhee hhaol biq hhae, yoqhhaeq laoq Momil e Suqhhaq taq e saeziq e yilsi mael cholmoq qiq miq’ae geemyeq gil biq e mulhhael mael mul hhaeq lye gee hhae, kaol cholmoq xi qiq miq onglci e haetaeq vae eiq Momil e saeziq mael haelnaeqmyel hhael bi loq lael maoqlye hhae.
Qiq nao laoq, yoqhhaeq maeqgael lael’oqlye buqga e ngaechil aelsiq qiq siq zaeq do hhei’laol, qiqlaqmyel oqma koq tullaeq biq’ae. Yoqhhaeq laoq haelzael’ae laoqmyel oqma koq dyul wae lye kei biq hhae, kaol naeciq teel zaeq hhei’laol laoqhaol vae hhaeqnaeqnaeq hhae. Yoqhhaeq aeqnaol qiq nao’ae nael keel biq kaol yiyuanl’ae caiq fuzaeq yil wae siq, maeqmeeq myel e silqinq peqlal vae, yoqhhaeq e honglhongl longllongl mael’ae xiljun du’lal vae lye jinqcaq du hhei. Yisen nae’naemyel yoqhhaeq’ae zonglmeeq biq, ngeelfeiq, yoqhhaeq’ae du’lal biq e xiljun mael gu’lal aeqmyel hhae, kaol yoqhhaeq e honglhongl longllongl mael bi buqga vae, kaol nyeq’ei ta nyeq’ei maq mul lal myel peqyil vae.
Suq nao e xalvuq’ae, mqsi jiaolhuil e aqsseq aeqnilhael’ae geegaeq gil biq: “Yiyuanl vae aqsseq aeqnil Zhang Gang’qiangq’ae fu lael gil biq maoqlye hael laoq, aeqnaol naolli qiq pu wae fu lael gil.” Yisen gee: “Yaeqmil aeqnaol naolli yanqsuiq xi yil pinq di byel hhei’laol Hhaoqsongl e tyuqvae hoqli maoqlye wae.” Aqsseq aeqnilhael qiq miq aeqnaol’ae qiq miq yiyuanl vae li kaol yoqhhaeq’ae fu li gil biq’ae.
Ngael eiq haeqmiq yaol sheeq hheikaol yiyuanl vae li aeqwae. Yiyuanl vae keelli fu, ngaeteel e mqsi eiq cholnael zhol e yiq kongl’ae zhol hhae, mqsi laoq fu lael gil hael’ae sheeqcaq biq, tyutoq e cholyaeqhael’ae haeqnyuqsaeq lye gee biq, kaol aqsseq aeqnil Zhang Gang’qiangq saeq’ol qye’li hhei’laol bael banlliq maoqlye doq deelhhei hhae. Ngaeteel cholnael zhol e yiq kongl’ae do’li laol, mqsi gee tullaeq: “Noteel myeqbongq gu’ngae hheikaol aqsseq aeqnil Zhang Gang’qiangq’ae heeldoq wae bael gee gil biq. Ngaeq’ae zhoq gaeq hhei laeq laol zhee mulsaeq laeq’ae, ngael haelmillye yisen gee gol e yaeqmil sil maoqlye wae lye e cholnael’ae heeldoq bael gee biq laeq? Ngael yil fen zong nyuq hhei’laol, cholnael e ssuqhhal dongqpyeq vae haoqtul deelhhei kaol heeldoq gee tullaeq, kaol xilnye gee: “Ngael gaeq e Aeqdae Momil o, nol ngaeteel yaol zhee nael biq e aqsseq aeqnil Zhang Gang’qiangq’ae bi fu lael laeq kaol meeqyaevae lye gee lil. Ngael yoqhhaeq’ae heeldoq haelmillye bael gee biq maoqlye maeq loq yae, ngeelfeiq, ngael silqinq niq mal nyuqdeel lil. Laefuq qiq mal laoq, yoqhhaeq ngaeq’ae xoqxiq e suqhhaq sael gol laq’ae, kaol Momil e Suqhhaq taq e saeziq e yilsi mael cholmoq qiq miq’ae haelmeeqlye geemyeq biq maoqlye gee gol laeq’ae, yoqhhaeq yaeqmil’ae lye milcaeq taq ae’lye deelsae hheikaol noq e tyuqvae hoqli hhei kaollaoq, yoqhhaeq haelmillye noq’ae daqyinl gol biq mael bi peqlal laeq, kaol cholmoq tyu qiq miq yaol noq’ae haelmillye hhael bi siqsongl lael laeq? Aeqnaol qiq mal laoq, nol milcaeq taq’ae zhol fu, qiq zael laoq, cholyaeq yuq hhaeq lye ssuqhhal ae’lye maeq tullael kiq e cholyaeq yaol noq tyuqvae baq li kaol noq’ae bi zonglmeeq maoqlye zongl hhae, ngeelfeiq, noq e yiqsi’ae maeq keellael ongl biq’ae, kaol cholnael tyutaeq yaol nol zhol e tongqgee ae’lye gonglbyu qiq mal duqbongq hheikaol noq e yiqsi’ae pyeq do ga hhei biq, cholyaeq tyu yuq hhaeq e xinlxin gae’lye noq lye ssuqhhal ae’lye maeq tullael kiq e tyutaeq yaol zonglmeeq biq vae. Yaeqmeel, Hhaoqsongl o, aqsseq aeqnil Zhang Gang’qiangq noq’ae daqyinl gol biq e silqinq mael maeq zongl byel gae’lye, kaol ngaeteel xuldyulmyel cholyaeq yoqhhaeq’ae heeldoq bael gee biq gae’lye, nol laoq ngaeteel e xinlxin gae’lye yoqhhaeq’ae zongglmeeq biq, kaol shenqjiq bi mol du’lal laol, yoqhhaeq laoq aeqyoyoq e aeqhhaol taq’ae peqlal e silqinq mael haelnaeqmyel cholyaeq’ae hhae geegaeq biq wae, xilnye laol, haelnaeqmyel e cholyaeq laoq yoqhhaeq e silqinq mael gaeq hhei’laol xinlxin hhael bi za lal biq lye nyuqlil.”
Heeldoq gee byel hhei’laol, aqsseq aeqnil Zhang Gang’qiangq e aeqhhaol’ae zonglcheeq beq hhei biq e ji’qil mael’ae ceq du hhei mael nyeq’ei ta nyeq’ei hhael wenqdinl lael vae. Ngaeteel fu li gol biq e aeqnaol qiq nao, yoqhhaeq sil vae lye gee e yotyel maeq gaeq lael’ae, suq nao laol, yoqhhaeq’ae nael biq mael hhael meeq hoqlael biq vae lye gee e yotyel gaeq lael’ae. Siq nao maeq keel myel, mqsi ngaeteel’ae aqsseq aeqnil Zhang Gang’qiangq laoq meeq hoqlael ongl maeqhe lye qiq hhaeq maeq nyuq keel myel meeq hoqlael biq vae, kaol cuqyuanl kei vae, Momil lye yoqhhaeq yaol zonglmeeq biq vae lye geegaeq gil laeq’ae.
Aqsseq aeqnil Zhang Gang’qiangq cuqyuanl kei hhei aeqnaol, xinlxin nyeq’ei hhael meeq lael biq vae. Yoqhhaeq gee: “Momil lye ngaeq yaol silhhael vae lye ee hoqlaeq laeq, ngael Momil’ae nyeq’ei haelmeeqlye gaeq biq maoq, yoqhhaeq’ae fuqsil biq maoq, ngael cholmoq xi qiq miq’ae Momil e suqhhaq taq e saeziq e yilsi mael haelmeeqlye geemyeq gil biq maoq.”
(Cu e qiqhhaeq: Zhang Ailgoq)
